Los bailles y dances d´ Asturies

Asturies, ye una rexón de gran bayura folclórica y a mou na variedá de bailles rexonales que con mayor o menor evolución caltuviéronse hasta los nuesos díis.

Toa danza o baille, constituye una forma d´espresión corporal, a través d´un conxuntu de movimientos coordinaos rítmicamente.

Los momentos y llugares propios de les dances y bailles tradicionales, tán en relación cola propia especificidá de la fiesta comunitaria del ciclu festivu anual (Antroiru, Virxen del Carmen, ...), o d´una fiesta familiar (esfoyaces, samartinos, filandones, ...).

Tenemos diferentes bailles dependiendo de les zones.

* Bailles de la zona Oriental:

• El Pericote: Ye un de los bailles astures más vieyos. Provién del Oriente asturianu, magar que perduró sólo na zona llanisca. Ye una danza na qu´intervienen d´ambos sexos, distribuies en grupos de tres (1 home y dos muyeres), nómase triada. Los homes avancen, retroceden, afalagan, blinquen y la muyer sigue un movimientu deslizante. Una d´elles ye perseguida pol "Perico", mientres que la otra persíguelu a él.
• El Corri-corri: Ye una de les dances más ancestrales xunto col Pericote. Ye orixinaria de la zona de Cabrales, onde un varón, el "bailín" da réplica a un grupu de 6 muyeres, que lleven nes sos manes sendos ramos de lloréu, mientras que les cantadores, muyeres vieyes que toquen el tambor y les panderetes, entonen el romance de "La peregrina y el pastor".
• Otres dances son: La Danza d´Arcos de Ribadesella y LLanes, el Xiringüelu de Naves y la Danza de Santa Ana.

* Bailles de la zona Central:

• El Xiringüelu: Baille de fiesta como danza mui fuerte y mui saltada, con acompañamientu de voces al son de la gaita. Ye danza de romería. Al son de la conocida música "A coyer el trébole..." bien conserváu na zona de Pravia, esti antigu baille asturianu.
• La Xota: Baillase formando dos files: mozos y moces colocaos unos frente a otros. Son munches y estremaes. Ente elles cabe destacar la de Payares.
• Les Xiraldilles: Ye un baille híbridu, entemecíu de danza prima y baille a lo sueltu. Hay bayura de melodíes y cantares, pues yera un baille mui practicáu. LLetres como "N´Uviéu nun me caso" "Mandilín de ringo-rango", son lletres de les mesmes. Les más conocíes son les xiraldilles de Llaviana y d´Avilés.
• La Danza Prima: Danza casi esclusiva d´Asturies que presenta 3 característiques: ye colectiva (participen los miembros d´una comunidá), circular (xuníos pelos meñiques faciendo un corru, xirando en dirección contraria a les aguyes del reló) y coral (ensin istrumentación dalguna, son los propios danzantes quienes entonen los romances).

* Bailles del Occidente:

• La Muñeira: Son bailles d´importación de la vecina Galicia, que nel centru d´Asturies, inda mantienen so vixencia. Báillase por parexes y como estilu de baille llibre, nun precisa de más acompañamientu que d´una gaita, tambor o pandieru y daquién qu´entone una melodía del so saltarín y contagiosu ritmu. Esisten variantes en forma, como son les muñeires de Illano y Vegadeo.
• El Regordixu: Ye la danza vaqueira cabezalera. Pertenez al mundu ritual relixiosu de los vaqueiros de Villazón, Lluarca y Tinéu. Tamién se la conoz como la "Danza del corno", y practícase xeneralmente nes reuniones del pueblu de Boal.
• La Xota: Báillase nes fiestes patronales de la zona de Cangas del Narcea. Consta de 5 xotes, acompañaes pola gaita, pandereta y en dalgunos casos de la payecha. Les más conocíes son : la Xota de Cangas, Xota de L.leitariegos y la Xota de Cadaveo.